Liber Psalmorum 45
Nova Vulgata Bibliorum Sacrorum Editio
© Libreria Editrice Vaticana Fons: vatican.va
1 Magistro chori. Secundum " Lilia... ". Filiorum Core. Maskil. Canticum amoris. 2 Eructavit cor meum verbum bonum, dico ego opera mea regi. Lingua mea calamus scribae velociter scribentis. 3 Speciosus forma es prae filiis hominum, diffusa est gratia in labiis tuis, propterea benedixit te Deus in aeternum. 4 Accingere gladio tuo super femur tuum, potentissime, magnificentia tua et ornatu tuo. 5 Et ornatu tuo procede, currum ascende propter veritatem et mansuetudinem et iustitiam. Et doceat te mirabilia dextera tua: 6 sagittae tuae acutae - populi sub te cadent - in corda inimicorum regis. 7 Sedes tua, Deus, in saeculum saeculi; sceptrum aequitatis sceptrum regni tui. 8 Dilexisti iustitiam et odisti iniquitatem, propterea unxit te Deus, Deus tuus, oleo laetitiae prae consortibus tuis. 9 Myrrha et aloe et casia omnia vestimenta tua; e domibus eburneis chordae delectant te. 10 Filiae regum in pretiosis tuis; astitit regina a dextris tuis ornata auro ex Ophir. 11 Audi, filia, et vide et inclina aurem tuam et obliviscere populum tuum et domum patris tui; 12 et concupiscet rex speciem tuam. Quoniam ipse est dominus tuus, et adora eum. 13 Filia Tyri cum muneribus; vultum tuum deprecabuntur divites plebis. 14 Gloriosa nimis filia regis intrinsecus, texturis aureis circumamicta. 15 In vestibus variegatis adducetur regi; virgines post eam, proximae eius, afferuntur tibi. 16 Afferuntur in laetitia et exsultatione, adducuntur in domum regis. 17 Pro patribus tuis erunt tibi filii; constitues eos principes super omnem terram. 18 Memor ero nominis tui in omni generatione et generatione; propterea populi confitebuntur tibi in aeternum et in saeculum saeculi.
Ubi affertur 26
- Hoc caput Quas Primas(§7)Sacramentum Caritatis(§35)Vita Consecrata(§15)
- v. 1 Summi Pontificatus(§62
§63) - v. 2 Vita Consecrata(§15)
- v. 3 Sacramentum Caritatis(§35)Vita Consecrata(§15)
- v. 8 Summa (LA)(III 72.2
III 72.3) - v. 10 Summa (LA)(II-II 183.2
II-II 188.1) Munificentissimus Deus(§26) - v. 11 Maximum Illud(§18)Munificentissimus Deus(§26)
- v. 12 Munificentissimus Deus(§26)
- v. 13 Munificentissimus Deus(§26)
- v. 14 Summa (LA)(II-II 168.1
Suppl 95.1) Munificentissimus Deus(§26) - v. 15 Ad Petri Cathedram(§40
§77) Munificentissimus Deus(§26) - v. 16 Munificentissimus Deus(§26)
- v. 17 Summa (LA)(III 67.2)
- v. 23 Presbyterorum Ordinis(§4)